إضراب المعاهد الخاصة باللغة الانجليزية فى برمنجهام

bushra mubark الجمعة مارس 25, 2011 12:27 am

بالامس أخطرتنا معلمة الانجليزى الرئيسية أن المعهد (مجمع BIRMINGHAM METROPOLITAN ) للغات وكل المجمعات الاخرى سوف ينزلوا الشارع كل واحد أمام مقره للتعبير عن الاحتجاج على سياسة الدولة التى سوف تقلص كل المنح لدراسة اللغة لتصبح 50% وهذا يعنى تشريد 50% من المعلمين والمعلمات ليصبحوا عاطلين عن العمل وهذا يشكل هاجس كبير فى أوروبا وهو العطالة عن العمل على الرغم من أن بند الصرف على العطالة فى هذه الحالة (الفصل التعسفى ) تعطيك الدوله مايصل 95% من مرتبك الاصلى مع دفع المستحقات الاخرى من علاج وسكن وتأمين صحى وإجتماعى ولكن تبقى المشكلة عند المواطن الاوروبى هى كيف يملأ الفراغ ؟؟؟ خاصه أن المواطن الاوروبى لايوجد عنده بند بكيات يتكسر فيها باليوميين والتلاته ولا عرس يقرن مرات مع السماية (قالوا زمان الناس تحضر العرس ومن دخله لى حفله لى وحم لى مستشفى نامن يحضروا السمايه ويرجعوا الناس للبلد بعد ما ياكلو سماية العريس يعنى بعد 10 شهور !!!) لا كسير فى مستشفيات ولا فى تمارين الهلال والمريخ ومباريات الموردة ولا فى إستفتاء وإنتخابات ومشورة شعبية ولا فى سماية ولا فى فقير بداوى بالمحاية ولا فى شيخ عندو قناية !!الاوربيين مشكلتم (ماقروش !!) ونحنا مشكلتنا قروش الشغال مفلس والعطال مفلس ومدبرس والقاسم المشترك بينهم الجيب الفاضى والترس العاضى .
نرجع لموضوعنا والله مرق الموضوع من أيدى الموضوع صليت الظهر فى الجامع الجوار المعهد وجوار على الشاعر رئيس الجمعية ومابعيد من الجمعية !!زمان كنت بصلى وفاتحة الامام ما برجاها لانى بكون متأخر من الحصه خمس دقائق والمُدرسة عارفنى كلمتها من أول يوم وقالت لى خمسة دقايق لى حدى عشر ممكن أكتر من كده تقابل الادارة وممنوع الدخول !!آها أنا يا جماعة قلت للمدرسة لو دايرانى أشارك أنا بهتف بالعربى (زنفة زنقة ودار دار وبيت بيت وسجن سجن غرامة غرامة) والمدرسة تموت بالضحك لانها تعرف الكلام ده كلو يا جماعة العالم ما أصبح (زنقه زنقه ) مش قريه صغيرة !! على الشاعر قال لى مالك الليلة ما مستعجل وجارى وكمان جايب شنطتك داكى والله شنو ؟؟ قلت ليهو لا والله عندنا إضراب وأنا زُغت منو كفاية حقى فى الاضرابات أختو شاركت وفرقت نامن قلبى أنقطع فى ديمقراطية الصادق المهدى براها شهر نفرق فى ناس كوبر !! قال لى والله ود حلال عندى مشوار على الجمعية أرح معاى عندنا زيارة من جهة عايزة تدينا دعم ودى فرصه يكون الرئيس والسكرتير موجود وعلى الاقل تعمل تمرين للانجليزى بتاعك .
وصلنا وقلت لى على لو عايز تمشى كدارى أنا جاهز لو بى عربيتك أنا جاهز مشينا بالعربية ورتبنا المكتب والفصول وجهزنا مرطبات وشاى سريع وخلال ساعة كان الوفد الزائر وكانت الزيارة ناجحة أحسن مليون مره فى المشاركة فى الاضراب .