قصيدة حملنتيشية عن الدهب فى السودان رأيت أن أثرى بها موضوع بحثى عن الدهب

bushra mubark السبت أبريل 24, 2010 8:01 pm

الدهب الدهب .... يكاد يكاد عقلى يذهب
مليون نفر أو قد يزيد ..الكل يفتش للدهب
إسبوع يفتشو ليل نهار..... من غير تعب
***********************
من كل أصقاع البلاد الكل حضر.. من غير نصب
واحدين يفتشو بالجهاز واحدين يكوسو على الركب
واحدين لقو الكيلو وزياده... والكل تحرك وأنكرب
حفروالتلال حفروالجبال. حفرو الرمال ماخلو طب
سابو الزراعة والتجارة وكاسو الشراب من القرب
عمرت مدن عمرت قرى ....ومن بعيد النار لهب
البيع يكون حاضر.. وكاش تمسك ملايين كالرطب
ناس الشمال لقو كل منال باعو الكتير حتى الحطب
أعمل حسابك للقدر.. والموت هو حق ودفن الترب
سمعنا بى قصصاً تشيب والحظ يكون مرات كعب
تمسك حجر تقول غنيت ....يطلع جرام لو إنسكب
واحدين جهازم مانضم.. واحدين جهازم بس عجب
إسبوع ويحسب كيلو كيلو.. واحدين جرام واحتجب
الحظ يكون نايم معاك ..واحدين حظوظم بس دهب
الاعمى شايل للمكسر.. تضحك يمين من غير سبب
جنبك عديييل واحد غنى... وخمسة كيلو ولا كضب
**************************
العبيدية فيها الناس كتيير.. ركبو الجديد
ركبو لى أحسن حديد والخير الخير يزيد
غيّر البيت القديم وغيّر ....الباب الحديد
وبنى بالعقد بالعقد... بالسرامييك الشديد
تزوج العازب سنين سنين من أحلى غيد
وجاب المهر .. كفى العروس ملاهو جيد
الشيله نصها بس دهب دهب ودهب أكيد
وعزم الضيوف عدد الالوف عدداً عديد
وكفى كفى جيرانو وحتى حيران المسيد
والمولى يرزق ورزقو واسع وكمان يعيد
من غير حساب بس إنت أدعو زيد وزيد
الصلاة فى فجرها مافى تأخير لى الشديد
وماتفتش العذر الغياب لو كان كان وحيد
صلى وأسجد وأشكر أشكر الخالق المجيد
على رحمتو من غير حساب ورزقو واسع للعبيد
على رحمتو من غير حساب ورزقو واسع للعبيد